అయోధ్య శ్రీ రామ మందిర ప్రాణప్రతిష్ఠ

 ఎన్నాళ్ళకు ఏన్నేళకు 

ఉత్తరభారతాన

అయోధ్య పుణ్యక్షేత్రాన

రామజన్మభూమి నందున

భవ్యమందిర గర్భాలయాన

శుభము శుభము

జయము జయమను

మంగళధ్వానాల నడుమ

తామరపై స్థానక భంగియై

కొలువుదీరెను శ్రీరామదేవర

మోమున చిరుమందహాసము

చేతన ధనుర్బాణముల్ బూని

ఠీవిగ పొడవైన నిలువెత్తు విగ్రహము

చూడగ అయోధ్య బాలకరాముని

కన్నుల పండుగే గాదె! అదియే

సర్వలోక దివ్యమంగళకరము

శ్రీ రామ జయ రామ జయ జయ రామ

ఓ శీతాకాలం

సమయం 8.30 కాని చుట్టూరా చీకటి కమ్మేసి తిష్టవేసింది

జోరుగా మంచువాన తుంపరజల్లుల తప్పెటలు మ్రోగిస్తుంటే

మోడువారిన చెట్లకి ప్రకృతి మంచుదూదెలతో సొబగులద్దగా

ఎక్కడికక్కడ కుప్పలుతెప్పలుగా మంచుపేరికల వెండికొండలు

వేడిస్థాయి సున్నాకి 28 మెట్లు దిగిపోయి చలీశ్వరుడి తాండవం

ఇంక నింగిలోని నక్షత్రాల జాడైన కానరాకుండా పోయాయి

కరడుగట్టి స్తంబించిపోయిన నదీ ప్రవాహాన్ని చూస్తే

కాలగమనం ఆగిపొయిందేమో అని మాటిమాటికి సందేహం

కాలాన్ని రేయింబగళ్ళుగా పంచుకుని ఏలే రవిచంద్రులలో

శీతాకాలమప్పుడు మాత్రం తమ్ముడిదే పైచేయి అన్నట్టుంది

(ఔలు 17/01/2024 at -28 °C)

శుభోదయం నేస్తం

 నీ చెక్కిలి తాకే ప్రతి చిరుగాలి ఓ సేదతీర్పు

నెర్వగల్గితే ప్రతి పరిచయం ఒక గుణపాఠం 

పొందిన ప్రతి అనుభవం ఓ మెలుకొలుపు

గత జీవితం భారమే కావచ్చు గాని

భవిష్యత్తు దానికెన్నో రెట్లు ఆశాజనకం

కలలు కల్లలు కాకముందే 

అవి కనుమరుగయ్యే లోపే

'పట్టువిడువని ప్రయత్నం' అనే ఉలితో 

ఒక్కో కలని చెక్కి చూడు మిత్రమా

ఏమో ఏదో అద్భుతం జరిగి

కళ్ళుచెదిరే కళాఖండం రూపుదిద్దుకుంటుందేమో

నిన్న నవ్విన నోళ్ళే రేపు కొనియాడతాయి

వెక్కిరించిన చేతులే మరల చప్పట్లు కొడతాయి

సరిగ్గా దృష్టి పెట్టాలి గాని

నీ గమ్యం నీచేతిలోనే

అదిగదిగో 

లేలెమ్మని తట్టిలేపుతూ

మరలా వచ్చింది 

మరో ఉదయం

నీ కలల సాకారం కోసం

ప్రతిరోజు ఒక అవకాశం

అదే కాలమిచ్చు బహుమానం

అందిపుచ్చుకుంటావో 

జారవిడుచుకుంటావో

నీ ఇష్టం ఓ నేస్తం

శుభోదయం

(ఔలు 18/01/2024)