ఏమని చెప్పను

నీలితామరలనుబోలిన కన్నులదానా

దేనిని చూడమంటావు?

నీ కళ్ళనా?

అవి చూస్తున్నవాటినా?

నీ మందారసుందరవదనశోభని కన్నులార గాంచినప్పుడు
నీ మాటలు ముత్యాలై రాలిపోతుంటే ఒడిసి పట్టుకోలేకున్నాను
ఇంత పరధ్యానమేంటని కంటిసైగలతో నిలదీస్తే
ఏమని చెప్పేది?
సప్తవర్ణాలన్నీ కలబోతగా నీ ముఖాన మెరుస్తుంటే
అది నాకు వజ్రపుఖని లాగ కనిపిస్తున్నదని చెప్పనా

నీ ముఖకవళికల్లో నవరసాలు అమోఘరీతిన ఉట్టిపడుతుంటే
వాటిని మౌనంగా ఆశ్వాదిస్తూ నిశ్చేష్టతను పొందనాని చెప్పనా
ఏం మాట్లాడుతున్నావని ఎదురుప్రశ్న వేస్తే ఏమని బదులిచ్చేది?
భాషనే మర్చిపోతున్నాను
ఇంక భావాన్ని ఎలా వ్యక్తపరిచేది?

- 09/02/2015