వసంతకాలం

ప్రకృతిలో వసంతవైభవం నిలువెల్లా తాండవిస్తోంది
కొప్పున్న మల్లెలు దోపుకొని మురిసిపోయే నాతిలా
చెట్లన్ని ఆకుపచ్చని చిగుళ్ళను సింగారించుకున్నాయి
గ్రీష్మంలో ప్రతాపం చూపిద్దామనుకున్నాడో యేమో
రవికిరణ బాణాలు నునివెచ్చగా తగులుతున్నాయి
నీలాకాశం ఏమైనా తక్కువ తిందా
భూలోక భామలకు తానేమి తీసిపోనంటూ
పూటపూటకీ రంగులు మారిపోయే
మబ్బుల చీరకట్టి చూపరులను కట్టిపడేస్తోంది
తిమ్మెరగాలి జావళికి సైదోడుగా
వంతపాడుతున్నట్టున్నాయి పక్షుల రాగాలు
ఇక చందమామ కులుకులు చూడాలి
శిశిరంలో దిగాలుగా బుంగమూతిపెడితే
వసంతసంధ్యలో రోహిణి కోసమేనా అన్నట్టు
బుగ్గలు సొట్టపడేలా దరహాస సొబగులు అద్దుకున్నాడు
శిశిర ఏడారిలో రసతృష్ణతో అలమటించిన హృదయకోకిల
వసంతసరోవరంలో నేడు దప్పిక తీర్చుకుంది

(18/04/2016, పరి)