మనసుతీరు

స్వచ్చమైన తేటనీరు 

ఎండకి ఆవిరైతే మబ్బు

రెంటికి మూలమొకటే

కాని ఎంతటి మార్పు

తేటనీరు పారదర్శకతకు చిహ్నం
కారుమబ్బు దాపరికానికి మారుపేరు

మనసు నీరులాంటిదని
ఇతరేయ ఉపనిషద్వాక్యం

ఒక మనసు
వికసించిన పువ్వులాగ
స్వచ్చసౌగంధాన్ని
చుట్టూ వెదజల్లచ్చు

అదే మనసు
సంకుచితపు గోడల్లో
పూర్తిగా కూరుకుపోయి
కరడుగట్టిన రాయిలామారచ్చు

పువ్వుతో కొడితే సరసం
రాయితో కొడితే గాయం

మన మనస్సు
తేటనీరా లేక కారుమబ్బా
పుష్పమా లేక పాషాణమా
అన్నది మనకి మనం
వేసుకోవాల్సిన ప్రశ్న

- 24/05/2015