కావేటి ఘోష

కావేరి నదివోలె రక్తము పారే తమిళులను

ఎలాంటి ఇనుపసంకెళ్ళు కట్టిపడేయలేవు

కాని నేడు కావేటిలో ప్రవహిస్తున్నది ఉత్తనీరు కాదు
తల్లడిల్లిన తమిళరైతుల కళ్ళవెంబడి కారే రక్తకన్నీరు

వినబడుతున్నది గలగల పారుతున్న నదీతరంగధ్వనులు కాదు
ద్రావిడ వ్యవసాయిదారుల ఆక్రందనలు ఆర్తనాదాలు పెడబొబ్బలు

నేడు కావేరి తమిళనాటగాక రైతుల కళ్ళలో కన్నీరై ప్రవహిస్తోంది
పైరుపంటలు బీడువారినట్లే వాళ్ళ గుండెలు ఎండిపోతున్నాయి

పుడమితల్లి గుండెల్లోంచి పాలలాగ ఉబికి మానవాళికి లభ్యమయ్యేవి నదీజలాలు
దాహంతో గొంతు పిడచగట్టినా ఆకలితో మలమలమాడి కేకలుపెట్టిన పట్టింపే లేదో

మనుషులకి లేని జాలి వరుణుడికి కలిగి ఆయన కరుణ వానలాగ కురిస్తే
రైతు బుగ్గలమీద కన్నీరైనా ఆరకముందే నేల తడిసితడవక ఎండిపోతోంది

నాడు కళలతో శోభాయమానముగా వెలుగొందిన తమిళనాడు
నేడు కాంతివిహీనమై దాహార్తిచే బేలతనంతో అలమటిస్తోంది

శ్రీరంగనాథా నిద్రను వీడి కావేటిరాయుడవై తిరిగి జలకాలాడు
వరదరాజా వరదలాగ ఉప్పోంగెడి కావేరిని మరల ప్రసాదించు
అరుణగిరినాథా గంగను విడువనక్కరలేదు గాని గోడు పట్టించుకో
ఆరుమోములదేవా కావేటినందించి తమిళవేలుపనిపించుకో

-17/12/2014