సమర శంఖారావం

సంఘంలో జరిగినవన్నీ గమనిస్తూ, కళ్ళూ చెవులూ పనిచేస్తున్నా

కనిపించనట్లు వినిపించట్లు ఉండే ఓ కవీ! నీ హృదయం మాత్రం కరగడం లేదు

కాయకష్టము చేసినా కడుపుమంట చల్లారడం లేదు

ఆర్తనాదాలు వెలువడుతున్నా ఆదుకునే వారే లేరు

రెక్కలు ముక్కలు చేసుకున్నా డొక్కలెండిపొతున్నా

ఓ కవీ! నీ హృదయం మాత్రం కరగడం లేదు

శ్రమదోపిడియే ఆదాయం మధ్యవర్తుల సముదాయం

ధనదాహం అధికారమోహం అసంబద్ధ ప్రలాపం

బీడువారిన బ్రతుకుల స్థితి మరింత హీనమవుతున్నా

ఓ కవీ! నీ హృదయం మాత్రం కరగడం లేదు

కులమతాల వైషమ్యం వ్యక్తి వ్యక్తికీ మధ్య అగాధం

మతం మత్తులో మొరగడం ఆమాయక ప్రజలను కరవడం

ఇవన్నీ పసి హృదయాలను పాషాణాలుగా మారుస్తున్నా

ఓ కవీ! నీ హృదయం మాత్రం కరగడం లేదు

ప్రాంతాభిమానం భాషాభిమానం వికృత దిశలో పయనిస్తుంటే

విదేశీ వ్యామొహ విషమ జ్వాలలు హాహాకారాలు చేస్తుంటే

ఇవన్నీ ప్రగతి పథంలో పయనించాలనుకున్నవారి గుండెల్లో తూటాలై పొడుస్తున్నా

ఓ కవీ! నీ హృదయం మాత్రం కరగడం లేదు

ఈ భయంకర కల్లోల హాలాహలాల మధ్య ఒక అసంకల్పిత ఆశాకిరణం వెలువడింది…

ఆదే...

         సమర శంఖారావం... సంగ్రామనికి సంరంభం...

         విజయమే దాని లక్ష్యం... విప్లవమే దాని ధ్యేయం...

- 05/07/2006