కల-వాస్తవం

కలలు కనమనని ఓ పెద్దాయన హితబోధ చేశాడు

వినడానికి చాలా బాగుంది

కాని ఎత్తైన కలలు కనడమే నేరమని సమాజం కట్టుబాటు
ఆ కలలసౌధాల ఎత్తుని కొలవడం తప్పు అని దాని తీర్మానం

కన్నవి వెలపొడుగు కలలని చౌక కాదని తెలిసి గుండె క్రుంగిపోయి
నెత్తిమీద పావలాపెడితె దమ్మిడికి కొరగావనె వెక్కిరింపుల నడుమ
బ్రతుకులోని అతికఱకుదనానికి చిన్నారి చిట్టిగుండె తట్టుకోలేక
మనస్సులోనే ఊహలమేడలు, గాలికోటలు కట్టుకోవాలనిపిస్తుంది

జీవితమె భరించలేని దినసరి పీడకలలాగనిపించి
నిజముకాదు కల్లని తెలిసినా ఊహలకోనేటిలోకి మనస్సు దూకి ఈతకొడదామనిపిస్తుంది

ఆశ అనే ఉలితో ఊహలనే మట్టితో గుండెలో చెక్కుకున్న కలలశిల్పాలు వాస్తవాలనే అలల తాకిడికి చెదిరిపోయినప్పుడు
ఆశనుగాక ఆశయమనె ఉలిని చేబట్టి మట్టినిగాక బ్రతుకులాగనె కఱకుగావున్న బండరాతిని చెక్కి నునుపుచేయాలి
అప్పుడు ఎన్ని అలలు తాకిన చెక్కుచెదరక నిలబడుతుంది

ప్రస్తుతమనే నిప్పులకుంపటిలో కలల బొగ్గురాళ్ళు పడేసి కాల్చినప్పుడు
కొన్ని కలలు మలమలమాడి కనుమరుగవుతాయి
మరికొన్ని కణకణమండే నిప్పుకణికల్లాగ మెరుస్తు వేడిని పుట్టిస్తాయి
అజ్ఞామనే చీకటి సమసి మదిని కలతపెట్టే పొగ తొలగిపోతుంది

కలలు కనడమెంత ముఖ్యమో
వాటిని సాకారంచేసే సాధనాలను తెలుసుకోడమంతే ముఖ్యం
అప్పుడే కలలు నిజరూపం దాల్చడం తథ్యం
ఇది వాస్తవము

- 15/12/2014


సూచన: వెలపొడుగు = ఎక్కువ ఖరీదైన,  costly